ભુલો ભલે બીજું બધું, મા-બાપને ભુલશો નહીં.
અગણિત છે ઉપકાર એના, એને વિસરશો નહીં.
પથ્થર પૂજયા પૃથ્વી તણા, ત્યારે દીઠું તમ મુખડું.
એ પુનિત જનનાં કાળજા, પત્થર બની છુંદશો નહીં.
કાઢી મુખેથી કોળીયો, મોંમાં દઈ મોટા કર્યા,
અમૃત તણા દેનાર સામે, ઝેર ઉછાળશો નહીં. હ
હેતે લડાવ્યા લાડ તમને, કોડ સૌ પુરા કર્યા, એ કોડના પુરનારના, કોડ પુરવા ભુલશો નહીં.
લાખો કમાતા હો ભલે, (પણ) મા-બાપ જેના ના ઠર્યા, એ લાખ નહીં પણ રાખ છે, એ માનવું ભુલશો નહીં.
સંતાનથી સેવા ચાહે ચાહો, (તો) સંતાન છો સેવા કરો, જેવું કરો તેવું ભરો, એ ભાવના ભુલશો નહીં.
ભીને સુઈ પોતે અને સુકે સુવાડ્યા આપને, એની અમીમય આંખને ભુલી ભીંજવશો નહિ.
પુષ્પો બીછાવ્યાં પ્રેમથી, જેણે તમારા રાહ પર, એ રાહબરના રાહ પર, કંટક કદી બનશો નહીં.
ધન ખરચતા મળશે બધું, માતા-પિતા મળશે નહીં. જગ જીવન એના ચરણની ચાહના ભૂલશો નહીં